له‌ په‌یوه‌ندی له‌ گه‌ڵ چالاکیه‌کانی چه‌ند ڕۆژی ڕابردووی گه‌ریلاکانی هێزه‌کانی ڕۆژهه‌ڵاتی کوردستان هه‌ره‌که‌، په‌ژاک لێدوانێکی ڕاگه‌یاند.
په‌ژاک ڕایگه‌یاند، له‌ چالاکی گه‌ریلاکاندا له‌ هه‌رێمه‌کانی کرماشان، به‌ گشتی 43 پاسدار کوژراون ‌له‌ ناویاندا 7 یان پله‌دار بوون.
په‌ژاک هه‌روه‌ها ڕایگه‌یاند له‌ ئاکامی ئۆپه‌راسیۆنه‌کانی ئه‌رته‌شی ئێراندا، په‌یوه‌ندی نێوان په‌ژاک و هێزه‌کانی گه‌ریلا له‌و هه‌رێمانه‌ بڕاوه‌و و گه‌ریلاکانی هه‌ره‌که به‌ بڕیاری خۆیان بۆ پێش گرتن له‌ به‌رفراوانبوونه‌وه‌ی ئوپراسینه‌کانی هێزه‌کانی ڕژیم ئه‌و چالاکیانه‌یان ئه‌نجام داوه‌...

له‌ لێدوانه‌که‌دا په‌ژاک ڕایگه‌یاند هێزه‌کانی سه‌ر به‌ ڕژیمی ئێران له‌ هه‌رێمی شاهۆ، ئۆپه‌راسیۆنێكی ده‌ستپێکردووه و، له‌ ئێواره‌ی 24ی ئاڤریلدا له‌ نێوان گه‌ریلاکانی هه‌ره‌که‌ و هێزه‌کانی ڕژیمدا شه‌ڕ هاتۆته‌ ئاراوه‌.

په‌ژاک ڕاده‌گه‌یه‌نێت که‌ له‌ وه‌ڵامی ئۆپه‌راسیۆنی ڕژیمدا، گه‌ریلاکانی په‌ژاک له‌ ناوچه‌ی ڕه‌وانسه‌ری کرماشان، له سێ قۆڵه‌وه‌ هه‌ڵیانکوتاوه‌ته‌ سه‌ر سه‌ربازگه‌یه‌کی هێزه‌کانی ڕژیمی ئێران و، ڕێگای هاتووچۆیان بۆ ناوچه‌که‌ گرتووه‌.
دواتر گه‌ریلاکانی په‌ژاک به‌ ته‌واوه‌تی ده‌ست به‌سه‌ر سه‌ربازگه‌که‌دا ده‌گرن و له‌و چالاکیه‌دا 25 سه‌ربازی ڕژیمی ئێران کوژران.

به‌ پێی لێدوانه‌که‌ی په‌ژاک، گه‌ریلاکانی ئه‌وان له‌ هه‌مان هه‌رێم، هه‌ڵیان کوتاوه‌ته‌ سه‌ر سه‌ربازگه‌یه‌کی تر و، چه‌ند به‌شی ئه‌و سه‌ربازگه‌یه‌ به‌ته‌واوه‌تی له‌ ناوبران. زۆربه‌ی سه‌ربازه‌کانی ڕژیم سه‌نگه‌ره‌کانیان جێهێشتووه‌ و هه‌ڵاتوون. گه‌ریلاکانی په‌ژاک ده‌که‌ونه‌ ناو ئه‌و سه‌ربازگه‌یه‌ و11 ماشێنی سه‌ربازی و زۆر که‌ره‌سته‌ی سه‌ربازی تر سووتێندران و بێ که‌ڵک کران.

هاوکات کاروانێکی ماشێنی سه‌ربازی که‌ به‌ هاواری ئه‌و سه‌ربازگه‌یه‌وه‌ ده‌چوو، که‌وتۆته‌ که‌مینی گه‌ریلاکانی پژاک و له‌ ئاکامدا ماشێنێکی سه‌ربازی به‌ ته‌واوی تێکشکێنرا و، یه‌کێکی تر بێ کاریگه‌ر کرا .په‌ژاک ڕایگه‌یاند له‌ ئاکامی ده‌ستپێکردنی ئۆپراسیۆنی نوێ له‌ هه‌رێمه‌که‌دا، شه‌ڕ و پێکدادانه‌کان بۆ ماوه‌یه‌کی درێژ درێژه‌ی کێشاوه‌.

ده‌رباره‌ی زیانه‌کان، په‌ژاک ڕاده‌گه‌یه‌نێ که‌ له‌و چالاکیه‌دا به‌ گشتیی 43 نیزامی سه‌ربه‌ ڕژیم ، له‌ ناویاندا 4 ئیتلاعاتی و 7 سه‌ربازی پله‌دار کوژراون.

په‌ژاک هه‌روه‌ها ڕایگه‌یاند که‌ گه‌لێک چه‌ک، ته‌قه‌مه‌نیی و که‌ره‌سته‌ی سه‌ربازی که‌وتۆته‌ ده‌ستی هێزه‌کانی ئه‌وان‌.

په‌ژاک ئاماژه‌ به‌ به‌رده‌وام بوونی ئۆپراسیۆنه‌کان ده‌کات له‌ هه‌رێمه‌که‌ و ڕاده‌گه‌یه‌نێت که‌ له‌ دوای ئه‌و چالاکیانه‌ی ناوچه‌ی ڕه‌وانسه‌ر له‌ پارێزگای کرماشان، ڕژیمی ئێران ڕه‌وشی نائاسایی ڕاگه‌یاندووه‌، هه‌رێمه‌که‌ به‌ تۆپ و هه‌لیکۆپته‌ری کۆبرا بۆمبباران ده‌کات.


پارتی ژیانی ئازادی کوردستان پژاک ده‌رباره‌ی زیانی گه‌ریلاکان، ڕاده‌گه‌یه‌نێت، گه‌ریلایه‌کی هه‌ره‌که‌ له‌ کاتی هه‌ڵکوتانه‌ سه‌ر سه‌ربازگه‌که‌ی ڕه‌وانسه‌ر گیانی له‌ده‌ست داوه‌ و له‌ کاتی کشانه‌وه‌ی هێزه‌کاندا ڕووبه‌ڕووی سه‌ربازانی ڕژیمی ئێران بوونه‌وه‌و و له‌ ئاکامدا 4 گه‌ریلا گیانیان له‌ ده‌ست داوه‌.
هه‌ره‌که ناسنامه‌ی ئه‌و 5 گه‌ریلایه‌ به‌و شێوه‌یه‌ ڕاده‌گه‌یه‌نێت:

گه‌ریلا یڵدرم کایا، ناسراو به‌ ئینتیقام ئه‌له‌داغ، له‌ دایکبووی 1981 ی بازید له‌ باکووری ووڵات.



گه‌ریلا ئه‌رداڵ ئالتوون ، ناسراو به‌ سه‌رخۆبوون په‌روه‌ر، له‌ دیکبووی 1986 بیره‌جیکی ڕوحا له‌ باکووری کوردستان.



گه‌ریلا ڕه‌زا مورته‌زه‌وی، ناسراو به‌ دڵبرین چیا، له‌ دایکبووی ساڵی 1985 ی‌ سه‌قزی ڕۆژهه‌ڵاتی کوردستان.



گه‌ریلا حه‌سه‌ن کالین، ناسراو به‌ باران گازی، له‌ ساڵی 1987 له‌ مازیداغی سه‌ر به‌ ماردین له‌ باکووری کوردستان له‌ دایک بووه‌.



گه‌ریلا به‌هیجه‌ چیچه‌ک، ناسراو به‌ به‌رچه‌م لیلیان، له‌ دایکبووی ساڵی 1981 له‌ ناوچه‌ی وان له باکووری کوردستان.